Đenova: Brod pod italijanskom zastavom i dalje drži posadu u neizvjesnosti
Izvor: Radio Kotor
Autorka: Tamara Vuković
Foto: Posada broda "Santa Cruz"
Brod “Santa Cruz”, koji vije italijansku zastavu, i dalje drži posadu među kojima je pet crnogorskih državljana u neizvjesnosti – bez plata i osnovnih prava garantovanih međunarodnim propisima.
Kako je za Radio Kotor kazao električar Sreten Antunović, situacija postaje sve napetija, a pokušaji brodara da umanji iznose koje bi trebalo da isplati — očigledni su.
-Kao i prethodnih dana, vlasnik odgađa ispunjenje obaveza do posljednjeg momenta.
U međuvremenu su počela prepucavanja između njega i P&I kluba, a sve s ciljem da nam se umanje zarade koje bismo eventualno naplatili preko osiguranja-kazao je Antunović.
Osiguravač broda, London Shipowners’ Club, dobro je upoznat sa situacijom, ali konkretna reakcija izostaje.
Posada, među kojom je devet pomoraca – pet iz Crne Gore, te po jedan iz Hrvatske, Srbije, Rumunije i Gruzije – mjesecima nije primila plate.
Pomorci su zadržani na brodu usidrenom u Đenovi, dok brodar navodno čeka uplatu od čartera u iznosu od 660.000 eura.
Najnoviji mejl ITF inspektora Frančeska di Fjorea, koji je dostavljen predstavnicima posade, dodatno je izazvao nezadovoljstvo.
Di Fiore navodi da su predstavnici njegovog sindikata (FIT-CISL) posjetili brod, te da su im data uvjeravanja da će, ukoliko novac stigne, brod isploviti za Napulj, gdje bi se završili radovi, nakon čega bi bio stavljen u redovnu liniju za Alžir i Španiju.
Takav pristup, međutim, posada smatra neodgovornim i pasivnim.
-ITF inspektor Di Fiore očigledno ne pokazuje odlučnost ni spremnost da stane u zaštitu prava pomoraca, kao što je to ranije činio Luka Šimić iz Rijeke.
Zato smo i podnijeli žalbu glavnoj kancelariji ITF-a u Londonu-kazao je Antunović.
Poseban problem, kako tvrde članovi posade, jeste mogućnost da brodar, u dogovoru sa P&I klubom, prikaže umanjene obaveze kako bi se isplatio samo dio potraživanja.
Prema Međunarodnoj konvenciji o radu pomoraca (MLC 2006), koju je potpisala i Italija, pomorci imaju pravo da ostanu na brodu dok im se ne isplate zaostale zarade.
To uključuje:
- Pravo na zadržavanje broda ("retenzione")– posada može tražiti da se brod ne pomjera dok se ne riješe sva potraživanja.
- Pravo na tužbu– uz podršku sindikata (ITF, CGIL, CISL) ili uz pomoć advokata, mogu pokrenuti pravni postupak.
- Mogućnost "arresta broda"– sudska mjera kojom se brodu zabranjuje isplovljavanje dok se ne izmire dugovanja.
Drugim riječima, posada ne mora da napustiti brod i može pravnim putem zatražiti punu isplatu svojih zarada.
Redakcija Radio Kotora ostaje u stalnoj komunikaciji s crnogorskim pomorcima i nastaviće da prati razvoj situacije.